SuomiMies seikkailee -dáhpáhus boahtá Ohcejohkii ja Anárii

KKI-govva SuomiMies seikkailee -temáin. Govva: KKI-prográmma/ Studio Juha Sorri

Vuollegis šielmmá dearvvasvuođalihkadandáhpáhus SuomiMies seikkailee boahtá Ohcejohkii ja Anárii. SuomiMies seikkailee lea jagis 2007 álggahuvvon riikkaviidosaš konseapta, man váldoulbmilin lea movttiidahttit bargoahkásaččaid dearvvaslaš ja lihkadeaddji eallinvuohkái. Lappi guovllus konseapta lea ollašuhtton aktiivvalaččat jagi 2013 rájes. Ohcejogas dáhpáhus lea vuosttas geardde ja Anáris njealját geardde.
18–64-jahkásaččaide oaivvilduvvon SuomiMies seikkailee lágiduvvo Ohcejoga Áilegas-guovddážis gaskavahko 27.9. dmu 14–19 ja Avvila Valástallandálus duorastaga 28.9. dmu 14–19. Namastis fuolakeahttá SuomiMies sávvá liggosit buresboahtin maiddái nissoniid!

Dáhpáhus movttiidahttá buot bargoahkásaččaid atnit fuola iežaset veadjimis!
SuomiMies seikkailee -dáhpáhusain testejuvvojit nuvttá gorutčoakkádus, čárvunfápmu sihke sávrivuohta iige testemiin dárbbaš bivastuvvat iige šieđđaluvvat.
Dáhpáhusain movttiidahttet bargoahkásaččaid giddet fuopmášumi iežas árgii ja erenomážit barggus ja asttuáigge veadjimii. Dutkamušaid mielde buorre fysalaš veadju veahkeha ceavzit baicce barggu fysalaš maiddái psyhkalaš losádusas. Hedjonan veadju fas – erenomážit sávrivuhtii guoski veadju – lea oktavuođas vásihuvvon nuonddahallama lassáneapmái. Dearvvasvuođa ja bargonávcca doalaheapmái eai dárbbašuvvo nu imašlaš valástallandagut. Juo jeavddalaš lihkadeapmi ja beaivválaš árgaaktiivvalašvuohta reahkkájit doallat bargonávcca ja veaju dakkár dásis, ahte fámut reahkkájit nu bargguin go asttuáiggege.
Dáhpáhusat leat veaigin, vai nu máŋggas go vejolaš beasašedje báikki ala. Bargoaddi sáhttá doarjut ja movttiidahttit bargiidis lihkadeaddji eallinvuogi nu, ahte addá vejolašvuođa fitnat dáhpáhusas bargoáigge. Dáhpáhusain lea maid vejolaš diŋgot nuvttá bargoservošii guoski raportta, mas oaidná bargoveaga dili oppalašvuohtan. Bargosearvvušraporta lea vejolaš, go mihtidemiin fitnet seamma bargoservošis 13 olbmo.
Oppalohkái bargoaddit sáhttet lasihit bargiid árgaaktiivvalašvuođa ovdamearkka dihte nu, ahte movttiidahttet bargiid johtit bargomátkkiid ainjuo muhtun muddui vácci dahje sihkkelastimiin biillain vuodjima sadjái sihke ordnejit bargiide skuvlema, mas oahpistuvvo doallat bargobeaivvi áigge ovdamearkka dihte lášmmohallanbottuid, mainna sáhttá duollet dálle botket bargama.

Mihtidemiin fárrui persovnnalaš čoahkkáigeassoraporta
Go dearvvasvuođa vuoibmeteasttat leat čađahuvvon, guhtege oasseváldái dahkkojuvvo persovnnalaš čoahkkáigeassoraporta, mas oaidná iežas dili oppalohkái. Dasa lassin bohtosiid tulkomii lea vejolaš oažžut veahki dearvvasvuođalihkadeami ámmátolbmos. Dearvvasvuođadili mihtideamit dolvot buohkanassii sullii 30 minuhta/olmmoš. Báikki ala ii goittot gánnát boahtit hoahpuin, dasgo teastačuoggáide sáhttá gártat vuordit. Mihtidemiid áigge ii dárbbaš bivastuvvat iige šieđđaluvvat, nu ahte báikki ala sáhttá boahtit dábálaš biktasiiguin. Dušše gorutčoakkádusa mihtideapmi gáibida vehá ráhkkaneami: dat dahkkojuvvo báljesjulggiid, nu ahte iđđes gánnáha guođđit suohkkobuvssaid eret ja coggat dan sadjái juolgái suohkuid, maid lea álki nuolastit eret.
*Ohcejogas Áilegas-guovddážis káffe fállun daidda, geat oassálastet dáhpáhussii.
SuomiMies seikkailee -dáhpáhusaid ollašuhttimis vástidit guovlluguovdasaš lihkadansearvi Lapin Liikunta ry sihke Ohcejoga asttuáiggedoaibma ja Anára lihkadandoaibma. SuomiMies seikkailee -konseapttas vástida Kunnossa kaiken ikää -prográmma.
Dáhpáhusaide lea nuvttá sisabeassan – buresboahtin fárrui!

Lassedieđut sihke govvamateriála:
Lapin Liikunta ry
Dearvvasvuođalihkadeami ovddideaddji Elina Ahokas
tel. 040 8329 321, elina.ahokas@lapinliikunta.fi
SuomiMies seikkailee -ruoktosiiddut www.suomimies.fi