Čájáhusat

ČUOIKA!” 15.6.-15.9.2017


Čuoikka hurra, dego iešalddes dáhpáhuvvi gieđain fađasteapmi ja sakŋideaddji gáskinsajit leat ollugiidda oahpes geassevásáhusat. Muhto man ollu mii diehtit, mas dovdá sierra čuoikašlájaid dahje manin dovdočoarvvit leat čuikii nu mávssolaččat? Maid mearkkaša čuoikanjiŋŋálassii soajáid časkinleaktu? Čuoika!-čájáhusas muitaluvvo čuoikka, dien divremáilmmi ilolaččat huraideaddji njammannjunaga eallimis. Teavsttat ja čuovgagovat leat dasa lassin dievasmahttimin daid dieđuid, mat mis leat olbmo ja dihto eallišlájaid gaskavuođas čuoikkaide.

Sápmi lea hui dovddus iežas gaskageasi ijahis ija ja issoras čuoikavalji dihte. Sámis lea goittotge leamaš duođaid čuoikás geassi maŋimuš badjel logi jagi dassái. Davviguovlluid divráivuohta (= varranjammi divrriid valljivuohta geassemánu gaskkamuttus borgemánu lohppii) lea goittotge nannosit cieggan olbmuid mielaide.

Iežaset uhccivuođas fuolakeahttá čuoikkaid duođaidge fuomáša – čuoikaságaid birra sáhttá lohkat juoba aviissain. Vássán geasi áigge mii leat beassan lohkat earret eará ng. goalmmát buolvva čuoikagavdnjejeaddjiin, main leat váikkuheamen vaikko guđelágan ávdnasat ja mat sulastahttet bajiloainnu dáfus goas čoavddagoartta ja goas fas radiotelefovnna. Bláđiin leat almmustuhtton maiddái gulaskuddamat das, man mielas mii livččiimet, jos čuoikkat jávkkašedje oalát dán min plánehtas – ahte livččiigo diet min mielas buorre vai heajos ášši. Gieskadaš gieddedutkamuša vuođul fas testejedje, mo biktasiid ivnnit geasuhit čuoikkaid.

Ja nugo beaivi badjána álo nuortan, de seamma vissásit maiddái boahtte jage vuosttas liegga áigodagaid maŋŋá gullojit vuot hurramin diet oahpes givssálaččat min birra. Kortisonavuoidasiin sáhttá dálkkodit gáskinsaji bohtaneami ja sakŋideami, ja loahppageasis eatnašat mis leat juo nu hárjánan dieidda varranjammiide ahte eai šat báljo iđe bohtaneamit.

Čuoika!-čájáhusa lea buvttadan Luondduguovddáš Siida, ja čájáhus gullá oassin Suoma, Ruošša ja Norgga gaskasaš luonddusuodjalanovttasbargui. Dát geassi lea leamaš maiddái ON:a luonddu máŋggahápmásašvuođa temájahki. Čájáhus lea ovdan Siiddas 1.10.2010–30.1.2011. Siida lea rabas dálvebaji áigge maŋŋebárggas sotnabeaivái dbm 10–17, vuossárggaid Siida lea gitta. Buresboahtin!

Lassidieđut:
– spesiálaplánejeaddji Pasi Nivasalo, Luondduguovddáš Siida, tel. +358 (0)205 64 7749, šleađgap. pasi.nivasalo(at)metsa.fi

Čájáhusat 2015

EATNANŠADDU – ČÁJÁHUS RAHPAN
Áilegasdálus duorasdaga 10.9. 2015 dmu 18.00
Eatnanšattu- čájáhusas muitaluvvo luonddušattuin, maid sámit leat geavahan, ja šattuid šaddanguovlluin ja geavahanvugiin.
Ordnejeaddjit: Sámimusea Siida ja Ohcejoga gielda